Drljević: Volim karikaturu bez riječi koja se čita između redova

Darko Drljević je svojim radom uspio da ucrta Crnu Goru na svjetsku mapu umjetnosti – i to pomoću karikature. Iza njega je preko 280 nagrada, a za Ljetnji program Televizije E podijelio je priču o svom radu, počecima i značaju karikature.

- Svaki početak je težak i neizvjestan, ali je bio pun entuzijazma i vjere u sebe - prisjeća se Drljević, iako su ga, kako kaže, mnogi osporavali.

- Mnogi su mi govorili šta će ti to, danas se od umjetnosti ne živi, bolje neki drugi posao, ali ja sam bio siguran, i eto, svojim radom i talentom sam dostigao to da sam jedan od najnagrađivanijih karikaturista u svijetu - rekao je Drljević.

Kaže da su njegovi počeci bili mnogo drugačiji nego što je to danas za ljude koji se bave istim poslom – učestvovali su na festivalima, a radove slali, kako ističe, uživo – preko pošte, a ne mejlom kao danas.

- To je bilo mnogo teže, zahtijevalo je dosta troška, jer sam morao svaki put da plaćam poštarinu za moje pošiljke koje su bile dosta teške – desetak radova šaljete na neku destinaciju, često i udaljenu. Uvijek sam se snalazio, pa kad su počele da stižu nagrade, došlo je do neke satisfakcije. Radio sam za puno novina, puno portala, i svjetskih i naših -  istakao je Drljević.

Karikatura je širok pojam – može biti običan humor, ali može biti i politička, dnevnopolitička, može biti na zadatu festivalsku temu, salonska karikatura, portret karikatura... Puno je, kako kaže, oblika karikature.

- Kako će publika prihvatiti, zavisi od mentaliteta ljudi, pa i kulture ljudi. Onaj ko nije od malih nogu pratio karikaturu i strip, ne može to da shvati baš dobro, zato je kao pomagalo i tekst koji ide uz karikaturu, međutim ja to ne volim i ne praktikujem. Volim karikaturu bez riječi koja se čita između redova, - zaključio je Drljević.