Pitbul napao tri vlasnička psa u Park šumi Zagorič

U Park-šumi Zagorič danas je napušteni pitbul napao tri vlasnička psa.

- U Park šumi Zagorič napao nas je pušteni pitbul s leđa, zaklao mi je štene, odraslu ženku od mojih i jedno štene momka koji je šetao isto tuda. Svi su pukom srećom pretekli, našom brzom reakcijom jer smo se borili s njim i čupali mu ih iz usta - objavio je na svom nalogu na društvenoj mreži Iks (X) aktivista za ljudska prava i izvršni direktor asocijacije Spektra Jovan Ulićević.

- Pit je držan za klanje i sav je izranjavan, iako sam ga čvrsto držao nije pokušavao mene da zakolje, al moju majku jeste i ona je srećom dobro prošla. Satima smo ga tražili kad smo izvukli naše pse da ga makar s ulice maknemo, al ni traga od njega. Naišli smo na jednu lutalicu isto krvavu, al je nijesmo uspjeli uhvatiti da joj pomognemo, odmah je utekla -naveo je Ulićević.

Kako je dodao, komunalna policija kaže da nije nadležna.

Korisnik društvene mreže Iks (X) Milan Jovanović napisao je da je "drugi pas koji je žrtva pita za klanje" njegov. 

- Ne znam jesam li u životu prošao kroz stresniju situaciju od ove danas, dok slušam svoje stene kako bespomoćno cvili i jauče i gledam pita koji zaključava vilicu i krvoločno napada - napisao je on.