Belgijski ministar: Sravnićemo Moskvu sa zemljom ako Rusija napadne Brisel

Belgijski ministar odbrane Teo Franken rekao je u intervjuu za Brisels Tajm da bi NATO sravnio Moskvu sa zemljom u slučaju da Rusija napadne Brisel.

Dodao je da ga više zabrinjava rusko hibridno ratovanje nego mogućnost klasičnog napada.

Belgijski ministar odbrane snažno je stao u odbranu NATO saveza, poručivši da bi “NATO sravnio Moskvu sa zemljom”, ako bi Rusija ikada napala Brisel.

U opširnom intervjuu za list De Morgen, Franken je govorio o nizu gorućih sigurnosnih tema – od rata u Ukrajini i evropske odbrane do hibridnog ratovanja i nuklearnog odvraćanja.

Na pitanje strahuje li da bi ruski predsjednikVladimir Putin mogao izvesti konvencionalni raketni napad na Brisel, ministar je odgovorio bez zadrške “ne, jer bi time pogodio srce NATO-a, a tada bismo sravnili Moskvu”, jasan je bio Franken.

Pritom je izrazio čvrstu potporu američkom vođstvu u NATO-u te ponovno istaknuo svoje povjerenje u član 5 Sjevernoatlantskog ugovora, koji jamči zajedničku odbranu svih članica u slučaju napada.

Na pitanje bi li američki predsjednik Donald Tramp poštovao tu odredbu, Franken je odgovorio “naravno da bi. U Evropi postoji ogromna predrasuda prema američkoj vladi. Zašto ne bi poštovao član 5?”

Dodao je, međutim, da ga više zabrinjava rusko hibridno ratovanje nego mogućnost klasičnog napada.

- Krstareća raketa na Brisel? Tu nema dileme, član 5. odmah bi se aktivirao, kako god ga definisali. Putin to neće učiniti. Više me brinu sivi scenariji: mali ljudi koji podstiču rusku manjinu u Estoniji protiv “nacističkog režima”. Prije nego što shvatiš što se događa, oni su već anektirali dio Estonije - poručio je.

Odbacio ideju o evropskoj vojsci

Franken je odbacio ideju o zajedničkoj evropskoj vojsci, poručivši da se Belgija i dalje oslanja na NATO.

Kritikovao je veće evropske zemlje zbog, kako je rekao, “maksimalnog iskorišćavanja vlastitih tržišta”, te izrazio sumnju da bi se države koje se ni sada ne mogu dogovoriti oko zajedničke nabavke oružja mogle složiti oko integracije svojih vojski.

Ko vjeruje u evropsku vojsku, glavom je u oblacima. Srećom, imamo NATO, koji je ponovno dokazao svoju učinkovitost, primjera radi kroz vazdušni nadzor u Poljskoj i Estoniji.

Želi vojsku na ulicama Brisela

U razgovoru je Franken komentarisao i stanje u samom Briselu, rekavši da grad “voli, ali ponekad i mrzi”.

Podržao je prijedlog Georgea-Louisa Boucheza, funkcionera frankofonskih liberala (MR), da se vojnici rasporede na ulicama belgijske prijestonice kako bi se nadzirala žarišta trgovine drogom.

- Ako ne riješimo rat protiv droge i nesigurnost, briselski će rak metastazirati u flamanski Brabant. Ako to znači da treba vojnike na ulicama, onda ćemo ih imati -  zaključio je Franken.