Papa o eutanaziji: Izazivanje smrti pod krinkom lažnog saosjećanja

Papa Lav XIV. osudio je sve oblike eutanazije tokom današnje posjete francuskom hodočasničkom mjestu Lurdu, pozvavši ljekare i druge zdravstvene radnike da brinu o pacijentima koji pate, umjesto da okončavaju njihove živote.

- Moramo odbaciti iskušenje izazivanja smrti pod maskom lažnog saosjećanja. Nemoguće je smatrati izazivanje smrti nečim normalnim - rekao je Lav, naglasivši da „ono što je zakonito nije nužno i moralno“.

Niko nema pravo da odlučuje o životu „na osnovu laboratorijskih algoritama“, dodao je, izvijestila je agencija DPA.

Francuska je zakon usvojila ove godine

Poglavar Katoličke crkve kritikovao je zakonske okvire kojima je regulisana eutanazija u pojedinim evropskim zemljama, poput Holandije i Belgije.

Francuska Nacionalna skupština takođe je ove godine, nakon dugotrajnih rasprava, velikom većinom glasova usvojila zakon o potpomognutom umiranju.

Lurd je pretposljednja stanica Lavove posjete Francuskoj. Papa sjutra putuje u Mec, u blizini francusko-njemačke granice, gdje namjerava da održi govor o Evropi.