Razgovor i podrška važni za djecu koja osjećaju stres

Povratak u školu za djecu donosi druženje i nove obaveze, ali i određenu dozu stresa. Dok se jedni raduju početku školske godine, drugi mogu osjećati strah, nelagodu ili otpor prema povratku u školsku rutinu.

Psihološkinja Stela Burzanović kazala je da je važno da roditelji na vrijeme primijete promjene u ponašanju djeteta i obrate pažnju na ono što ih je izazvalo.

- Jako je važno ne pustiti to tek tako, konkretno kada govorimo o roditeljima, jer prvi koji će primijetiti promjene u svakodnevnom funkcionisanju, posebno kada su djeca kod kuće, jesu upravo roditelji. Primijetiće te promjene kod djece. Jako je važno tražiti uzrok. Šta je dovelo do toga? Da li možda neka prethodna situacija u školi, kada govorimo o raznim vidovima nasilja, gdje, radimo na tome da se sve to umanji i prekine, pa možda ih to navodi na novu školsku godinu, ta negativna promišljanja? Ili mogu biti neki uzroci da je u pitanju ocjena ili slično - pojasnila je ona.

Jako je važno, kako je naglasila, tražiti uzroke i da roditelj reaguje na vrijeme.

Povlačenje, izostanak komunikacije, agresivne reakcije, ali i žalbe na glavobolju ili bolove u stomaku mogu biti znak da dijete teško prihvata povratak u školu. Stručnjaci savjetuju da roditelji ne vrše dodatni pritisak, već da razgovaraju sa djecom i, ukoliko je potrebno, uključe školu i stručnu službu.

Učitelj u OŠ „Oktoih“ Savo Kovačević kazao je da su otvorena komunikacija i dogovor između roditelja i nastavnika važni za prepoznavanje i rješavanje problema u ponašanju djeteta.

- Vrlo sam otvoren u komunikaciji sa roditeljima, vrlo jasno izražavam ono što vidim. Sad ne kažem, nekad mogu i ja da pogriješim. Roditelj opet, sa druge strane, ima drugačiji odnos prema tome što čuje ili vidi. Jako je važna jasna komunikacija koja podrazumijeva rezultat. Kad kažem rezultat, mislim na neki zajednički dogovor između učitelja i roditelja, kako bi u nekom narednom periodu dijete radilo na tom ponašanju ili promjeni određenog ponašanja - naveo je Kovačević.

Zato je važno da početak školske godine ne bude obilježen pritiskom i strahom od ocjena, već podrškom, razgovorom i jasnom rutinom.

Roditelji bi trebalo da prate promjene u ponašanju djece, ali i da im pokažu da njihova vrijednost ne zavisi od školskog uspjeha. Cilj nije samo dobar rezultat u dnevniku, već da dijete u školu dolazi sa osjećajem sigurnosti i podrške.